Студенттер жастар комьюнити орталығында
Алматы қаласы Жетісу ауданының Жастар комьюнити орталығында Әбу Ханифа медресе-колледжінің шәкірттері арнайы танысу іс-шарасын өткізді. Аталған кездесу жастар арасындағы өзара байланыстарды нығайтуға және олардың әлеуметтік белсенділігін арттыруға бағытталды.
Іс-шара барысында студенттер орталықтың негізгі қызмет бағыттарымен кеңінен танысып, жастарға арналған білім беру, кәсіптік бағдар, еріктілік және шығармашылық жобалар жөнінде толыққанды мәлімет алды. Орталық мамандары қатысушыларға түрлі бағдарламаларға қатысу мүмкіндіктерін түсіндіріп, жастар бастамаларын қолдау тетіктеріне тоқталды.
Сонымен қатар, кездесу барысында шәкірттер өз ойларымен бөлісіп, пікір алмасу алаңында белсенділік танытты. Ашық форматта өткен диалог олардың жаңа идеялар ұсынып, болашақ жоспарларын нақтылауына мүмкіндік берді. Бұл өз кезегінде студенттердің тұлғалық дамуына, көшбасшылық қабілеттерін шыңдауға және қоғамдағы өз орнын табуына ықпал етті.
Іс-шара соңында қатысушылар мұндай тағылымды кездесулердің маңыздылығын атап өтіп, алдағы уақытта да бірлескен жобаларды жүзеге асыруға қызығушылық білдірді. Осындай бастамалар жастардың жан-жақты дамуына серпін беріп, олардың қоғамдық өмірге белсенді араласуына жол ашады.
